კანისა და ვენერიულ სნეულებათა სამეცნიერო-კვლევითი ეროვნული ცენტრი

• დერმატოლოგიური – კანის ალერგიული, ინფექციური (ჩირქოვანი, სოკოვანი, ვირუსული და სხვ.), პარაზიტული დაავადებების, კოლაგენოზების, რეტიკულოზების, აუტოიმუნური, გენეტიკური დაავადებების, აგრეთვე კანის დანამატების (თმა, ფრჩხილი და სხვ.) პათოლოგიების დიაგნოსტირება და მკურნალობა ბავშვთა და მოზრდილთა ასაკის პაციენტებში.

• დერმატო-კოსმეტოლოგიური – კანის, თმების, ფრჩხილების დაავადების მკურნალობასთან ერთად ტარდება შემდეგი დერმატოკოსმეტოლოგიური პროცედურები: მეჭეჭებისა და პაპილომების, ქსანთელაზმების და კონტაგიოზური მოლუსკების მოცილება, გაფართოებული სისხლძარღვების გაუფერულება, კანის გასაახალგაზრდავებლად ტარდება ქიმიური პილინგი, მეზოთერაპია, ბოტოქსის ინექციები, სახის ფორმის მოდელირება და ნაოჭების გასწორება შემავსებლებით, ტუჩების კორექცია. ასევე ასაკობრივი ფერისმჭამელას მკურნალობა მხოლოდ ჩვენთან აპრობირებული მეთოდით. დეპარტამენტი აღჭურვილია კანის მოვლისა და გაახალგაზრდავების უახლესი თანამედროვე აპარატურით.

• სქესობრივი გზით გადამდებ (სგგ) დაავადებათა – სქესობრივი გზით გადამდები დაავადებების (სიფილისი, გონორეა, ქლამიდიოზი, ტრიქომონიაზი, უროგენიტალური კანდიდოზი, ურეაპლაზმოზი, მიკოპლაზმოზი და სხვ.) დიაგნოსტირება და მკურნალობა.

• ვირუსული ინფექციების – მუშაობს ისეთ სერიოზულ პრობლემებზე, როგორიცაა ადამიანის პაპილომავირუსი, მარტივი ჰერპესის ვირუსი, ციტომეგალოვირუსი და სხვ. სამწუხაროდ ეს პრობლემა აწუხებს მოსახლეობის 45-50%-ს. ამ ვირუსებს შეუძლიათ გამოიწვიონ სერიოზული გართულებები, როგორიცაა მყარი ნევროლოგიური დარღვევები, ავთვისებიანი სიმსივნე, უშვილობა.

• ანდროლოგიური – მამაკაცთა უშვილობის, ერექციული დისფუნქციის, სქესობრივი გზით გადამდებ დაავადებათა და პროსტატიტების დიაგნოსტიკა და მკურნალობა. ანდროლოგიური დეპარტამენტი აღჭურვილია თანამედროვე აპარატურით, რომელიც წარმატებით გამოიყენება ზემოაღნიშნული დაავადებების მკურნალობაში.

• კლინიკურ-ლაბორატორიული დიაგნოსტიკის – კლინიკური და ბიოქიმიური გამოკვლევები უახლესი აპარატურით. სგგ დაავადებების დიაგნოსტირება წარმოებს სპეციფიური დიაგნოსტიკუმებით. ასევე სპეციფიური ბაქტერიოლოგიური ანალიზატორის საშუალებით ხდება გონოკოკის, ტრიქომონის, ურეაპლაზმის, სტრეპტო-სტაფილოკოკებისა და სხვა მიკრობების ინდენტიფიკაცია.

• განყოფილება “ჯანმრთელობის კაბინეტი” – ემსახურება მაღალი რისკის ქცევის მქონე ჯგუფებს (კომერციული სექს-მუშაკი ქალები, ჰომოსექსუალური ურთიერთობის მქონე მამაკაცები). წარმოებს სგგ ინფექციებზე უფასო კვლევა და მკურნალობა. მუშაობის პრინციპებია: რეგისტრაციის ანონიმურობა, პაციენტთა სრული კონფიდენციალობის უზრუნველყოფა, სგგი დიაგნოსტიკა და დაავადებების მართვა მსოფლიო ჯანდაცვის ორგანიზაციის და ევროპული გაიდლაინების სრული დაცვით, ფსიქოლოგიური პრე- და პოსტანალიზური კონსულტირება, რომელსაც ატარებს ფსიქოლოგ-კონსულტანტი.

• ფოტო და სხივური თერაპიის დეპარტამენტი – აღჭურვილია თანამედროვე აპარატურით და მოწყობილია ისე, რომ შეესაბამება მსოფლიო სტანდარტებს. ფოტოთერაპიული მეთოდი დღეისათვის ყველაზე ეფექტური მეთოდია ისეთი დაავადებების სამკურნალოდ, როგორიცაა: ფსორიაზი, პარაფსორიაზი, ვიტილიგო, ნეიროდერმიტი, სებორეული დერმატიტი, ფუნგოიდური მიკოზი, სკლეროდერმია, ვარდისფერი პიტირიაზი, ალოპეცია, აკნე და სხვა. ამ მეთოდით ნამკურნალები პაციენტების 90-96% კლინიკურად გამოჯანმრთელებულად ითვლებიან. დამტკიცებულია ამ მეთოდის სრულიად უსაფრთხოება და მაღალი ეფექტურობა.

• პოდოლოგიური კაბინეტი – თანამედროვე აპარატურით ხდება დისტროფიული და სოკოთი დაავადებული ფრჩხილის, ჰიპერკერატოზული კანისა და ნაპრალების დამუშავება, ჩაბრუნებული ფრჩხილის და კოჟიჟის მკურნალობა.

• ჰიდროკოლონოთერაპიის კაბინეტი – მსხვილი ნაწლავის ღრმა გამორეცხვა უახლესი ტექნოლოგიით აღჭურვილი აპარატურით.

მაღალკვალიფიციური დერმატო-ვენეროლოგების მთელი პლეადა, მათ შორის 5 პროფესორი, 20 მედიცინის დოქტორი, კანის დაავადებათა და სქესობრივი გზით გადამდები ინფექციების დიაგნოსტიკისა და მკურნალობის უახლესი მაღალტექნოლოგიური მეთოდები პაციენტებს აძლევს მაღალი, მსოფლიო დონის მომსახურების გარანტიას.

ცენტრის სამეცნიერო მიღწევები ასახულია სამეცნიერო შრომების კრებულთა 22 ტომში, საქართველოს დერმატო-ვენეროლოგთა სამეცნიერო კონფერენციების მასალებში, სამამულო და საზღვარგარეთის პრესაში. გამოქვეყნებულია 2000-მდე შრომა, მათ შორის საზღვარგარეთ – ასამდე. გამოიცა სახელმძღვანელოები, მონოგრაფიები, სამეცნიერო-პოპულარული ბროშურები. ცენტრის მეცნიერ-თანამშრომლები აქტიურად მონაწილეობენ მსოფლიოს მრავალ ქვეყანაში გამართულ სამეცნიერო კონფერენციებსა და სიმპოზიუმებში (აზერბაიჯანი, სომხეთი, რუსეთი, ისრაელი, უკრაინა, ბელორუსია, ლიტვა, საფრანგეთი, ჰოლანდია, ყაზახეთი, უზბეკეთი, თურქეთი, პოლონეთი, გერმანია, დიდი ბრიტანეთი, აშშ, შვედეთი, ნორვეგია, ესტონეთი და სხვ.).

კანისა და ვენსნეულებათა სამეცნიერო-კვლევითი ეროვნული ცენტრის საქმიანობის ძირითადი მიმართულებებია კლინიკური, ექსპერიმენტული, სამეცნიერო და პედაგოგიური საქმიანობა.