საქართველოს მუსიკალური კონკურსების ფონდი

საქართველოს მუსიკალური კონკურსების ფონდის მიზანია ხელი შეუწყოს ეროვნული საშემსრულებლო სკოლის განვითარებას, ახალგაზრდა მუსიკოს-შემსრულებელთა წარმოჩენას, დაეხმაროს მათ შემოქმედებითი კარიერის წარმართვაში.

არსებობის არც თუ დიდი ხნის მანძილზე, ფონდის მიერ ჩატარებულია: ოთხი - "პიანისტთა თბილისის საერთაშორისო", ხუთი - "საქართველოს მუსიკოს- შემსრულებელთა" და ხუთი - "ფრანსუა ლოლოს სახელობის ჩასაბერ საკრავთა" კონკურსი. მათში მონაწილეობა მიიღო 30 ქვეყნის 1000-ზე მეტმა ახალგაზრდა მუსიკოსმა. ბევრი მათგანი დღეს უკვე მსოფლიოში სახელგანთქმული მუსიკოსი, სხვადასხვა საერთაშორისო კონკურსისა და ფესტივალის ლაურეატია.

ფონდის მიერ ორგანიზებულ კონკურსებზე ჟიურის წევრები და მოწვეული სტუმრები ატარებენ მასტერკლასებს.

"პიანისტთა თბილისის საერთაშორისო კონკურსი" 2002 წლიდან `ჟენევის საერთაშორისო მუსიკალური კონკურსების მსოფლიო ფედერაციის (WFIMC)-ის წევრი-კონკურსია. 2008 წელს თბილისში, პიანისტთა თბილისის საერთაშორისო კონკურსის მასპინძლობით ჩატარდა WFIMC-ის გენერალური ასამბლეა.

ფონდის დირექტორია პროფ. მანანა დოიჯაშვილი.