საქართველოს ადვოკატთა ასოციაცია

2001 წელს ძალაში შესული ადვოკატთა შესახებ კანონის შესაბამისად დაიწყო საქართველოს ადვოკატთა ასოციაციის ჩამოყალიბების პროცესი. 2005 წლის 27 თებერვალს ჩატარდა და 2005 წლის 11–12 მარტს გაგრძელდა საქართველოს ადვოკატთა ასოციაციის დამფუძნებელი კრება. კრებას დაესწრო 904 უფლებამოსილი პირი. თუმცა, ეს მცდელობა არ დამთავრებულა საქართველოს ადვოკატთა ასოციაციის საბოლოო ფორმირებით.
2006 წლის 21იანვრის ბოლოსათვის ადვოკატთა ასოციაცია ფორმალურად ჩამოყალიბდა, როგორც ერთიანი ასოციაცია, რომელიც უფლებამოსილია გასცეს ლიცენზია და აწარმოოს დისციპლინური დევნა, უზრუნველყოს განგრძობადი სწავლება ადვოკატებისათვის.
2006 წლის აპრილში მიღებულ იქნა საქართველოს ადვოკატთა ეთიკის კოდექსი და დისციპლინური დევნის დებულება. 2006 წლის მაისში ,,საქართველოს ადვოკატთა ასოციაციამ” ჩაატარა პირველი საკვალიფიკაციო გამოცდა. საქართველოს ადვოკატთა ასოციაციის შექმნამდე გამოცდის ჩატარებაზე პასუხისმგებელი იყო საქართველოს იუსტიციის უმაღლესი საბჭო. 2006 წლიდან დღემდე საქართველოს ადვოკატთა ასოციაციის მიერ შატარებულ იქნა 9 საკვალიფიკაციო გამოცდა, რომელშიც მონაწილეობა მიიღო 13 000-ზე მეტმა მსურველმა.

2009 წლის დეკემბერში ჩატარდა რიგით მეორე ადვოკატთა საერთო კრება, სადაც ოთხი წლის ვადით არჩეულ იქნენ საქართველოს ადვოკატთა ასოციაციის თავმჯდომარე, აღმასრულებელი საბჭოს 11 წევრი, ეთიკის კომისიის 15 წევრი, სარევიზიო კომისიის 3 წევრი.

საქართველოს ადვოკატთა ასოციაცია არის პროფესიული გაერთიანება, რომელიც ახორციელებს იურიდიული პროფესიის თვითრეგულირებას.

ასოციაციის წევრი შეიძლება გახდეს საქართველოს მოქალაქე, რომელსაც აქვს უმაღლესი იურიდიული განათლება, გავლილი აქვს ადვოკატთა ტესტირება ან ჩაბარებული აქვს მოსამართლეთა, პროკურატურის მუშაკთა საკვალიფიკაციო გამოცდები, აქვს იურისტად ან ადვოკატის სტაჟიორად მუშაობის არანაკლებ 1 წლის სტაჟი, ამჟამად ასოციაციის წევრია დაახლოებით 3800 ადვოკატი.

საქართველოს ადვოკატთა ასოციაციის ძირითადი მიზნები და ფუნქციებია:
• საქართველოში მართლმსაჯულების განხორციელების და კანონის უზენაესობის განმტკიცების ხელშეწყობა;
• იურიდიული პროფესიის განვითარება;
• ადვოკატის უფლებების, პროფესიული თავისუფლების, ინტერესების და დამოუკიდებლობის დაცვა;
• საადვოკატო საქმიანობაში ჩაურევლობის უზრუნველყოფა;
• იურიდიული განათლების ხელშეწყობა და ადვოკატთა კვალიფიკაციის ამაღლება;
• უფასო იურიდიული დახმარების სისტემის ჩამოყალიბება და ხელშეწყობა;
• ადვოკატის პროფესიული ეთიკის ნორმების დაცვის უზრუნველყოფა;
• საზოგადოებაში ადვოკატისადმი ნდობის და რეპუტაციის ამაღლება;
• ადვოკატების სოციალური დაცვის ხელშეწყობა.
• ორგანიზება გაუწიოს ადვოკატთა საკვალიფიკაციო გამოცდებს;
• ხელი შეუწყოს ადვოკატთა ასოციაციის სასწავლო ცენტრის ინსტიტუციონალურ განვითარებას და განგრძობადი იურიდიული განათლების პოპულარიზაციას;
• გამოსცეს ასოციაციის პერიოდული ჟურნალი;
• მოიძიოს დაფინანსების წყაროები;
• შეიმუშავოს საადვოკატო ეთიკის ნორმები;
• მონაწილეობა მიიღოს კანონშემოქმედებით საქმიანობაში;
• განაზოგადოს სასამართლო პრაქტიკა;
• შექმნას ადვოკატთა, ადვოკატის სტაჟიორთა და საადვოკატო ბიუროების მონაცემთა ბაზა და უზრუნველყოს მათი განახლება;
• შეიმუშაოს ადვოკატთა წახალისებისა და დისციპლინური დევნის წესები და უზრუნველყოს მათი შესრულება;
• მიიღოს და გასცეს გრანტები.

ასოციაციის მართვის ორგანოებია ასოციაციის საერთო კრება და ასოციაციის აღმასრულებელი საბჭო. ასოციაციას ხელმძღვანელობს ასოციაციის თავმჯდომარე, რომელსაც ადვოკატთა ასოციაციის წევრთაგან, კანონითა და ასოციაციის წესდებით დადგენლი წესით, ფარული კენჭისყრით, დამსწრეთა უმრავლესობით, ირჩევს ასოციაციის საერთო კრება 4 წლის ვადით, კანდიდატის წინასწარი წერილობითი თანხმობის საფუძველზე.